पाँच दिनपछि चालकको शब भेटियो, जीप अझै भेटिएन

बेनीः पाँचदेखि कालीगण्डकी नदीमा जीपसहित बेपत्ता चालकको शब भेटिएको छ। बेनीदेखि घार जाने क्रममा बेनी–जोमसोम सडकखण्ड अन्र्तगत बैसरी नजिकैबाट कालीगण्डकीमा खसेको ग २ च ३६६० नम्बरको बोलेरो जीपका चालक रमेश खड्काको शब शनिबार भेटिएको हो।

दुर्घटनास्थल भन्दा ५ किलोमिटर तल गलेश्वर र बेनीबजारको बीच भाग जलेश्वर भन्ने स्थानमा खड्काको शब भेटिएको हो। नदीमा बालुवा निकाल्ने मजदुरहरुले खड्काको खुट्टा देखेपछि प्रहरीलाई खबर गरेका थिए। खड्काको शब पोष्टमार्टमपछि परिवारको जिम्मा लगाइएको प्रहरी नायब उपरीक्षक विश्वराज खड्काले जानकारी दिए।

चार दिनअघि साँझ ६ बजे बेनीबाट घर हिँडेका खड्का सम्पर्कमा नआएपछि प्रहरीले खोज्दा कालीगण्डकी खसेको अनुमान गरिएको थियो। चालक खड्काको शव भेटिएपनि जीप भने भेटिएको छैन। सडकबाट खसेको जीप गहिरो तालमा खसेको अनुमान गरिएको छ।

तीनदिन देखि नेपाल प्रहरी, सशस्त्र प्रहरी र नेपाली सेनाको टोलीले ताल वरपर खोजी गरेपनि अहिलेसम्म जीप फेला नपरेको खड्काले जानकारी दिए। ‘शब शनिबार दिउँसो ३ बजेमात्रै शब भेटिएको हो। त्यसभन्दा अघि त्यो तालमैसशस्त्र प्रहरीको गोताखोर टोलीले विशेष सर्च गरेका थियौँ’, उनले भने, ‘अझै जीपको अत्तोपत्तो छैन ।’

गहिरो र पानीको वेग बढी भएको ठाउँमा जीप खसेकाले जीप पत्ता लाग्न नसकेको भन्दै अझै केही खोजी गरिने प्रहरीले जनाएको छ ।

• Facebook
• Tweeter
• Google+
• Pinterest