राति पहिरो खसेपछि नारायणघाट–मुग्लिन सडक पुनःअवरुद्ध

चितवन । नारायणघाट–मुग्लिन सडकखण्डको चारकिलो भन्ने ठाउँमा आज राती पुनःपहिरो खसेपछि सडक अवरुद्ध भएको छ । इलाका प्रहरी कार्यालय मुग्लिनका प्रमुख प्रहरी निरीक्षक युगेन्द्रबहादुर हमालका अनुसार राती ८ बजेतिर पहिरो खसेको हो । पहिरो खसिरहेकाले पन्छाउने कार्य अगाडि बढाउन नसकिएको बताए।

सो ठाउँमा आज बिहान ९ः१५ बजे पहिरो खासेपछि अवरुद्ध भएको सडक पहिरो पन्छाएर १२ः३० बजे दुईतर्फी सञ्चालनमा आएको थियो। साँझ ५ बजेतिर पनि पहिरो खसेपछि पन्छाएर सडक खुलाइएको थियो पुनःराति ८ बजेतिर सडक अवरुद्ध भएको हमालले बताए।

पहिरो खसेको ठाउँ नारायण–मुग्लिनबाट चार किलोमिटर नारायणघाटतर्फ पर्दछ। सो सडक स्तरोन्नतिका क्रममा विस्तारका लागि भित्तो काटिएपछि विगत केही दिनयता सो ठाउँमा पटक–पटक पहिरो खसिरहेको छ। यसैबीच सडक अवरुद्ध भएपछि गाडीबाट झरेका एक यात्रु सडक छेउबाट त्रिशूली नदी किनारमा खसेका छन्।

प्रहरी निरीक्षक हमालका अनुसार साँझ सडक अवरुद्ध भएपछि सडक छेउमा पैदल हिँडिरहेका ती यात्रु नदीको किनारमा खसेका हुन् । अन्दाजी ३०/३५ वर्षका ती व्यक्ति पुरुष भएको उनले बताए। उनको उद्धारको प्रयास भइरहेको छ। सडकबाट भिरालो ठाउँमा खसेकाले उद्धार गर्न कठिन भइरहेको उनले बताए। खसेका व्यक्ति सकुसल रहेका छन् । पहिरो खसेको ठाउँबाट ती व्यक्ति तल खसेका हुन्। रासस 

• Facebook
• Tweeter
• Google+
• Pinterest